ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំក្រុមការងារ អភិបាលរងខេត្ត ថ្នាក់ដឹកនាំរដ្ឋបាលសាលាខេត្ត មន្ទីរ-អង្គភាពជុំវិញខេត្ត អាជ្ញាធរក្រុង-ស្រុក លោកគ្រូ អ្នកគ្រូ និងអាជ្ញាធរមូលដ្ឋាន ចូលរួមយ៉ាងកុះករក្នុងយុទ្ធនាការដាំដើមក្ងោកចំនួន ៣០០ដើម នៅព្រឹកថ្ងៃទី០១ ខែមិថុនា ឆ្នាំ២០២៦។ ​សកម្មភាពដាំកូនឈើនេះ ត្រូវបានធ្វើឡើងនៅលើដងផ្លូវទេពឧកញ៉ាឃ្លាំងមឿង ដោយចាប់ផ្ដើមពីចំណុចផ្លូវជាតិលេខ៥ រហូតទៅដល់វត្តហ្លួង ក្នុងគោលបំណងកែលម្អសោភណភាព បង្កើតគម្របបៃតង និងលើកកម្ពស់បរិស្ថានរស់នៅឱ្យកាន់តែមានភាពស្រស់បំព្រង។ ​នៅក្នុងឱកាសនោះ ឯកឧត្តមអភិបាលខេត្ត បានសង្កត់ធ្ងន់ថា ការដាំដើមក្ងោកនាពេលនេះ មិនត្រឹមតែជួយបង្កើតជាស្រមោលត្រជាក់ និងកាត់បន្ថយកម្តៅប៉ុណ្ណោះទេ ប៉ុន្តែវានឹងក្លាយជាផ្ទាំងទស្សនីយភាពផ្ការីកស្គុះស្គាយយ៉ាងស្រស់ស្អាតនៅថ្ងៃអនាគត ដែលអាចទាក់ទាញភ្ញៀវទេសចរជាតិ និងអន្តរជាតិឱ្យមកកម្សាន្តក្នុងខេត្តពោធិ៍សាត់កាន់តែច្រើនឡើង។ ជាមួយគ្នានោះ ឯកឧត្តមក៏បានអំពាវនាវដល់បងប្អូនប្រជាពលរដ្ឋ និងអាជ្ញាធរគ្រប់លំដាប់ថ្នាក់ ចូលរួមថែរក្សា ការពារកូនឈើទាំងនេះឱ្យលូតលាស់ល្អ ដើម្បីជាប្រយោជន៍រួមរបស់ខេត្តទាំងមូល៕

យោងតាមកិច្ចចង្អុលការដ៏ខ្ពង់ខ្ពស់របស់ ឯកឧត្តមអភិបាលខេត្ត រដ្ឋបាលស្រុកបាកាន ដឹកនាំដោយលោក ឆាយ គឹមម៉ុង អភិបាល នៃគណអភិបាលស្រុកបាកាន បានរៀបចំចលនាដាំដើមឈើ “១០០ដើម ក្នុង១ថ្ងៃ” ដោយមានការចូលរួមពី លោកអភិបាលរងស្រុក មន្ត្រីរាជការរដ្ឋបាលស្រុក លោក លោកស្រី មេឃុំ ក្រុមប្រឹក្សាឃុំ លោកគ្រូ អ្នកគ្រូ លោក លោកស្រី មេភូមិ អនុភូមិ សមាជិកភូមិ សិស្សានុសិស្ស និងកម្លាំងយុវជនភូមិបានចំនួន ៤ឃុំ មានឃុំត្រពាំងជង ឃុំខ្នារទទឹង ឃុំអូរតាប៉ោង និងឃុំបឹងខ្នារ នៃស្រុកបាកាន។ សកម្មភាពនេះ បានចូលរួមចំណែកលើកកម្ពស់បរិស្ថានបៃតង សោភ័ណភាព និងជំរុញការយល់ដឹងរបស់ប្រជាពលរដ្ឋ ជាពិសេសយុវជន និងសិស្សានុសិស្ស ឱ្យចូលរួមថែរក្សា និងអភិរក្សធនធានធម្មជាតិឱ្យកាន់តែប្រសើរឡើង៕

គម្រោងនេះធ្វើឡើងក្នុងគោលបំណងលើកកម្ពស់សោភ័ណភាព សុវត្ថិភាព និងសម្រេចឱ្យបាននូវចក្ខុវិស័យប្រែក្លាយក្រុងពោធិ៍សាត់ទៅជា «ក្រុងអភិវឌ្ឍន៍ និងបរិស្ថានបៃតង» ដើម្បីទាក់ទាញភ្ញៀវទេសចរ។

ការមិនចោលសម្រាមពាសវាលពាសកាល មិនមែនជាការងារស្ម័គ្រចិត្តនោះទេ ប៉ុន្តែវាជាវប្បធម៌នៃការរស់នៅ និងជាទំនួលខុសត្រូវក្នុងនាមជាពលរដ្ឋល្អម្នាក់